Serlig viðurskifti í Føroyum verða tikin við

Edmund Joensen, fólkatingsmaður, fekk einki ítøkligt svar frá danska løgmálaráðharranum, Nick Hækkerup, um politiið í Føroyum.

Danska stjórnin er nú í januar farin undir samráðingar við flokkarnar í fólkatinginum fyri at kanna, um grundarlag er fyri at gera semju um politiið og ákærumyndugleikan - semju, sum skal vara í nøkur ár, og byrja næsta ár.

Hendan semjan verður eisini galdandi fyri Føroyar, svarar hann. Tey serligu viðurskiftini í Føroyum verða tikin við í semjuni, sigur ráðharrin í stutta svarinum.

Afturúrsiglt

Politiið í Føroyum er afturúrsiglt sambært Edmundi Joensen.

Hann spurdi tí løgmálaráðharran, í hvønn mun nýggja semjan um politiið umfatar Føroyar.

Edmund Joensen sigur, at Ríkispolitiið hevur ikki gjørt nóg stórar íløgur í avlurting í Føroyum, kt-skipanin hjá politinum í Føroyum er avoldað, politiið hevur brúk fyri betri umstøðum til skotvenjing og skjótari atgongd til EIS skrásetingina.

EIS er dátugrunnurin Europol Information System.

Høvdu fund í heyst

Edmund Joensen og Nick Hækkerup høvdu fund um avbjóðingarnar hjá politinum í Føroyum í november í fjør.
 
Edmund Joensen vísti tá millum annað á, at avlurtingarpakkin, sum bleiv samtyktur í 2014, ikki er farin at virka í Føroyum enn.