Nýggjur húsarhaldsskúli í Klaksvík í 2023

Nýggi húsarhaldsskúlin í Klaksvík verður í fyrsta lagi liðugur á sumri í 2023. 

Tað stendur í svari frá Jenisi av Rana, landsstýrismanni í skúlamálum, til Beintu Løwe, løgtingskvinnu. 

Beinta Løwe spurdi m.a., hvussu lagt er komið við ætlanunum at byggja nýggjan húsarhaldsskúla í Klaksvík. 

Verkætlan hjá sjálvsognarstovni

Jenis av Rana, landsstýrismaður, ger í svarinum greitt, at talan er ikki um eina almenna verkætlan, men um eina verkætlan hjá sjálvsognarstovninum Húsarhaldsskúli Føroya, sum landsstýrismaðurin hevur heimild at stuðla við einum rentufríum láni upp til 21 mió. kr. 

Í svarinum kemur eisini fram, at verkætlanin er komin so mikið langt, at næsta stig er at fara undir prosjektering av bygninginum. Prosjektering og útbjóðing væntast at verða klárt í oktober. Skúlin hevur í hesum sambandi víst á, at tørvur er á stuðli til henda partin av verkætlanini. 

Pláss verður fyri 35 næmingum í nýggja húsarhaldsskúlanum.

Higartil hevur verkætlanin kostað 800.000 krónur.