Atlantsflog: Vit bíða eftir boðum

Johanna á Bergi, stjóri í Atlantsflogi, sigur í kvøld, at tey framvegis ikki hava flogfør, sum koma úr reyðum økjum, sambært vegleiðingini hjá danska Uttanríkisráðnum. 

Danmark er tó sett á reyða listan hjá summum øðrum londum, tó at danir sjálvir enn ikki hava sett seg á reyða lista. 

Men júst hvat tað merkir fyri Atlantsflog er óvist. Tað er tó greitt, at í morgin koma full flogfør úr Danmark til Føroya.

Hava sett neyðug tiltøk í verk

Johanna á Bergi sigur í kvøld, at tey hava sett neyðugu tiltøkini í verk fyri tey ferðandi, sum tey vita koma úr reyðum ella reyð/gulum økjum í heiminum.

Um so er, at Atlantsflog fær boð um at seta ferðafólk úr Danmark undir somu tiltøk, so fylgja tey tí. Enn hava tey tó einki frætt frá kreppuráðnum ella landsstýrinum. 

– Vit bíða eftir boðum og fara at fylgja tí, sum myndugleikarnir siga, sigur Johanna á Bergi í kvøld.