Ferðafólk úr Íslandi avvíst í Vágum

Fýra ferðafólk úr Íslandi vórðu í gjár avvíst á flogvøllinum í Vágum, sigur Michael Boolsen, fúti

Fyrradagin varð fyribils innferðareftirlit sett í verk í Føroyum. Hetta skuldi steðga møguligum útlendingum, sum ikki hava lógliga heimild til at ferðast inn í Føroyar og ríkisfelagsskapin, í at koma til Føroya.

Hetta varð gjørt í eini roynd at steðga smittuvandanum av koronavirusinum.

Fútin sigur, at vanliga vera ólóglig ferðafólk sett á sama flogfar avstaðaftur, men av tí at onki flogsamband var aftur til Íslands úr Føroyum, vórðu hesi fýra ferðafólkini sett á flogfarið til Danmarkar, har tey síðani kunnu flúgva aftur til Íslands.

Bót varð ikki givin

Vanliga verður bót givin, um fólk ólógliga royna at koma inn í landið, men hetta var ein serstøða, og tí varð bót ikki givin í hesum førinum, upplýsir fútin.

Hóast avmarkingar á ferðing til og frá útlondum, eru avmarkingarnar ikki galdandi innan fyri ríkisfelagsskapin.

- Danmark og Grønland eru ikki at rokna sum útlond, sigur Michael Boolsen, fúti.