Ongin epidemilóg enn

Tískil er ongin tingfundur ásettur til at viðgera nýggju epidemilógina. Fríggjadagin segði løgmaður, at hann væntaði at nýggja epidemilógin fór at vera klár, at lata løgtinginum til viðgerðar fyrst í hesi vikuni.

Men løgtingsformaðurin hevur ikki fingið nakrað fráboðan um tað enn. Dagførda epidemilógin skal í høvuðsheitum geva myndugleikunum møguleikan at geva boð og forboð ístaðin fyri tilmæli, eins og hevur verið gjørt síðan koronasmittan fór at gera um seg.

Løgreglan fær víðari heimildir

Nýggja epidemilógin skal harumframt eisini geva løgregluni heimild at handhevja boðini, um tey ikki verða fylgd. Í Danmark varð herda epidemilógin samtykt á grækarismessu, og føroyska epidemilógin tekur støði í tí donsku, segði løgmaður við útvarpið fríggjadagin.

Fleiri røddir hava síðstu dagarnar verið frammi um, at hendan lógin er ov víðgongd, tí hon tekur frælsisrættindi frá borgarum. Hetta ásannaði løgmaður eisini fríggjadagin, men legði aftrat, at serstøður, sum tann, vit nú eru í, krevja serlógir.

Epidemilógin verður væntandi gjørd sum sonevnd serlóg, sum verður galdandi í eitt tíðarskeið, og verður síðani ógildað aftur.