Epideminevnd tók ikki undir við ítróttakappingum

Epideminevndin kundi ikki taka undir við, at ítróttakappingar byrja tann 9.mai. 

Tað sigur Bárður á Steig Nielsen, løgmaður, í svari til Ingilín Didriksen Strøm, løgtingskvinnu, sum spurdi um avgerðina at lata samfelagið spakuliga uppaftur.

Løgmaður svarar, at áðrenn landsstýrið tók endaligu avgerðina um at lata samfelagið varisliga uppaftur, var ætlanin latin Epideminevndini til viðmerkingar. 

Epideminevndin hevði ikki viðmerkingar um, at vit í fyrstu atløgu lótu dagstovnar og barnaskúlarnar upp tann 20.apríl, sigur løgmaður.

Men hon kundi ikki geva ætlanini um, at ítróttakappingar byrja 9.mai, sítt tilmæli.

Bárður á Steig Nielsen sigur, at grundreglan í fyrsta upplatingarstiginum var, at vit skuldu hava størst møguligan samfelagsligan ágóða fyri minst møguligan vøkstur í smittubreiðingini.