Fornlutir skriva føroyingasøgu umaftur

Vit kenna flest øll søguna um Sigmund Brestirson, sum fyri 1000 árum síðani við svøri í hond kristaði Føroyar.

Í fornfrøðiliga útgrevstrinum hjá Tjóðsavninum niðri á Bakka á Velbastað, eisini nevndur Kirkjugarðsbakki, er ein fornur rundleittur kirkjugarður, har fornfrøðingarnir hava funnið kristnar gravir.

Í miðjum kirkjugarði er ein lítil kirkju- ella bønhústoft grivin fram. Undir hesi kirkjutoft eru grundarsteinar av eini eldri kirkju, og í moldini undir grundarsteinunum eru brend byggkorn funnin. Í mai 2020 vórðu hesi byggkorn tíðarfest til millum ár 765 og 905.

Merkir tað, at søgan skal skrivast umaftur? Tað spyrja vit Helga Michelsen, savnsvørð á fornfrøðideildini á Tjóðsavninum og Hans Andrias Sølvará, professara í søgu.