Kanna umstøðurnar hjá hoyribrekaðum

Avmarkað vitan er um fólk, ið hava hoyribrek í Føroyum. Tað sigur Hoyr - felagið fyri hoyribrekað í Føroyum.

Tí fara tey í næstum undir eina verkætlan, sum skal kanna umstøðurnar hjá fólki við niðursettari hoyrn í Føroyum, og síðani meta, um tørvur er á at tillaga viðurskiftini hjá teimum.

Granskingarráðið hevur játtað stuðul til verkætlanina.

Vita lítið

Hoyr sigur, at eingin veit við vissu, hvussu nógv fólk í Føroyum hava niðursetta hoyrn, nýta hoyritól, hvussu lívsviðurskiftini eru, og hvussu hetta ávirkar gerandisdagin hjá tí einstaka.

Neyvari vitan um tað fer at gera tað møguligt at skipa fyri frálæru til tey, sum hava við fólk við niðursettari hoyrn at gera.

Eisini skal vitanin brúkast til at kunna almenningin um lívsviðurskiftini hjá teimum við niðursettari hoyrn á arbeiðsmarknaðinum, sigur felagið fyri hoyribrekað í Føroyum.