Fyrireika bústaðir til fólk við seinheilaskaða

Fólk, sum hava seinheilaskaða, eru ikki væl fyri í Føroyum.

Bústaðir og tænastur vanta.

Tað ásannar landsstýriskvinnan í almannamálum, Elsebeth Mercedis Gunnleygsdóttir, í svari til Jóhannis Joensen, løgtingsmann.

Men arbeitt verður við at gera umstøðurnar betri, sigur hon.

Fyrireikað verður at byggja bústaðir til fólk við seinheilaskaða. Men tað tekur langa tíð at fyrireika almenn byggimál, og kostnaðarstigið er ein avbjóðing.

Tí verður eisini kannað, um alternativar hættir eru at loysa verandi bústaðaravbjóðing eins og umrøtt verður í frágreiðingini um bústaðapolitisk átøk.

130 á hvørjum ári

130 føroyingar fáa hvørt ár staðfest heilaskaða.

Landsstýriskvinnan ásannar, at tað er ein avbjóðing at veita nøktandi taluvenjing í Føroyum.

Almannaverkið og Sernám og Almannamálaráðið og Heilsumálaráðið hava tosað um samstarv og samskipan um viðgerðir og tænastur.

Endamálið er at hava taluvenjingina á einum staði.

12 ergo- og fysioterapeutar

Almannaverkið sigur, at neyðugt er at seta tveir ergo- og fysioterapeutar afturat, um bíðilisti ikki skal vera til endurvenjing. 

Harafturat er neyðugt at seta 12 ergo- og fysioterapeutar, skal Almannaverkið geva øllum viðlíkahaldsvenjing sambært lógini um almannatrygd og tænastur. 

Landsstýriskvinnan sigur seg hava raðfest játtan til endur- og viðlíkahaldsvenjing í uppskotinum um fíggjarlóg fyri 2021.