- Tíðindi, mentan og ítróttur
Kanna um føroyingar eisini fáa pensjón
![](https://kvf.fo/sites/default/files/styles/grein-ovasta-mynd/public/peter_hummelgaard.jpg?itok=butpD377)
Nú skal kannast, um arbeiðstíð í Føroyum og í Grønlandi telur við, tá fólk í Danmark hava rætt til pensjón fyrr enn ætlað.
Tað sigur Peter Hummelgaard, danski ráðharrin í arbeiðsmarknaðarmálum, í svari til Sjúrð Skaale, fólkatingsmann.
Nakrir flokkar í Danmark hava gjørt avtalu um, at fólk kunnu fáa pensjón, áðrenn tey eru komin í pensjónsaldur.
Í avtaluni stendur, at fólk, sum hava arbeitt í ES, EFTA, Sveis og Bretlandi, kunnu telja starvstíðina har við, tá tey søkja um pensjónina.
Men Føroyar og Grønland eru ikki við í avtaluni.
Pensjónsøkið yvirtikið
Sjúrður Skaale spyr ráðharran, um somu reglur ikki eru galdandi í øllum ríkisfelagsskapinum, so starvstíðin í Føroyum og Grønlandi eisini telur við.
Peter Hummelgaard svarar, at grønlendingar og føroyingar hava yvirtikið pensjónsøkið.
Tí eru londini ikki við í donsku avtaluni.
Men Peter Hummelgaard sigur seg vera sinnaðan at tosa við føroyingar og grønlendingar um málið.