Nýggjárskonsertin hjá FSO veruleiki leygarkvøldið

Nýggjárskonsertin hjá Føroya Symfoniorkestri í ár hevur verið tungur burður, tí spurningurin hevur alla tíðina verið, um konsertiin yvirhøvur kundi gerast veruleiki.

Men tónleikarar og leiðsla í orkestrinum eru treisk, og níggju tónleikarar úr útlondum hava - bara í sambandi við hesa konsertina - sitið í sóttarhaldi á Hotel Føroyum og bíðað.

Konsertin í ár verður ikki ein vanlig beinleiðis konsert við áhoyrarum. Talan verður um upptikna sjónvarpssending, sum verður send leygarkvøldið klokkan 19:30.

Hans Petur í Brekkunum greiðir frá um starvið sum stjóri í orkestrinum. Til hesa konsertina er hann ikki bara stjóri, tí Bernhardur Wilkinsson, sum stjórnar orkestrinum til konsertina, hevur yvirtalað Hans Petur at vera partur av saksofonkvartett í einum lagi, sum orkestrið skal framføra leygarkvøldið.

Hans Petur varð stjóri í Føroya Symfoniorkestri 1. november 2019. Hendan nýggjárskonsertin er sostatt hansara næsta við FSO. Vikuskiftissendingin hitti orkesturstjóran í Norðurlandahúsinum stutt áðrenn orkestrið fór undir upptøkurnar til sendingina leygarkvøldið.