Ókent verk hjá Mozart komið undan kavi

Wolfgang Amadeus Mozart sendi einaferð eitt bræv til systrina við einum klaverstykki, hann júst hevði skrivað. Gamaní fekk hon brævið, og sonur Mozart skuldi fáa tað frá henni - men hvussu er og ikki, so varð stykkið ongantíð framført - t.v.s. ikki fyrr enn nú, 265 ár eftir at tónaskaldið varð føtt. Tað var Suðurkoreanski klaverleikarin Seong-Jin Cho, sum mikudagin 27. januar á føðingardegi tónaskaldsins spældi verkið í beinleiðis stroyming hjá Deutsche Grammophon. Sagt verður um verkið, at tað varð skrivað í 1773, tá Mozart var 17 ára gamal. Mozart var tá staddur í Italia. Klaverleikarin Jóhannes Andreassen fekk fatur í nótunum seint hóskvøldið fyri, hetta innslagið skuldi gerast, og longu fríggjamorgunin kl. 10 sat hann klárur við klaverið í Tórshavnar Musikkskúla at spæla forvitnisliga nýfunna verkið eftir Wolfgang Amadeus Mozart. Jóhannes hevði sostatt ikki havt góða tíð til at venja stykkið, men professionellur, sum hann er, spældi hann verkið leikandi lætt - prima vista - fyri bæði Vikuskiftissendingini og føroya fólki. Hoyr Jóhannes greiða frá og spæla Allegro í D eftir Wolfgang Amadeus Mozart.