Plátuspælarin er liðugur!

Fyri trimum vikum síðani vitjaði Vikuskiftissendingin Edvard Nyholm Debess, sum var farin undir at byggja ein plátuspælara. Nú er plátuspælarin liðugur, og Vikuskiftissendingin fór at fregnast. Undir nálini snurrar Pat Metheny Trio, meðan Edvard stákast í køkinum. Hann tekur eina pausu frá chilirættinum, hann er í ferð við at gera, og vit fara at tosa um úrslitið, hvørt plátuspælarin nú livir upp til vónirnar. Og tað ger hann. Ikki tí, ongin plátuspælari er fullkomin, ein klangur er vist nokk har, sum Edvard heldur ikki skal vera, men sum heild er Edvard stak væl nøgdur við úrslitið.

Vit lurta eftir fleiri plátum, m.a. eini serligari testplátu, sum Edvard hevur at máta ljóð við. So leggur Edvard plátuna Nightfly við Donald Fagen á. Hendan plátan er tiltikið væl framleidd, og bæði undirritaði og Edvard sjálvur halda, at smálutir í tónleikinum, man ikki hevði hoyrt áður, nú koma fram. Hoyr prátið her.