Eykajáttan til H-bygning, hjálparpakkar og Ternuna

Fíggjarmálaráðið gav mánadagin løgtinginum eitt uppskot um eykajáttanarlóg.

Uppskotið verður helst lagt fram í morgin.

Jørgen Niclasen, landsstýrismaður, vil ikki siga, hvussu nógvar pengar, landsstýrið biður um hesaferð.

Men H-bygningurin hjá Landssjúkrahúsinum, hjálparpakkarnir og Ternan kosta mest.

Selja partabrøv í Tjaldri

Landsstýrið biður eisini um loyvi til at selja partabrøvini hjá landinum í Tjaldri.

Tjaldur ásetur á hvørjum aðalfundi prís á partabrøvum felagsins. Tann prísurin verður brúktur, um landið fær loyvi at selja partabrøvini.

Landið eigur tvey prosent í Tjaldri. Fyri prísin, sum nú er, fáast sjey til átta milliónir fyri tey. 

Jørgen Niclasen sigur, at vil løgtingið, at partabrøvini verða seld, verða tey boðin út alment til sølu.

Hetta verður fyrsta sølan av almennum partabrøvum. Tann næsta verður í heyst.