Fáa meira koppingarevni burtur úr hvørjum glasi

Føroyska sjúkrahúsverkið fær meira burtur úr hvørjum glasi av koppingarevni, enn heilivágsframleiðararnir høvdu roknað við.

Pfizer/BioNTech væntaði upprunaliga, at fimm skamtar fingust burtur úr hvørjum glasi av koppingarevni, men hetta varð síðani broytt til seks.

Men starvsfólkini í føroyska sjúkrahúsverkinum fáa sjey skamtar úr hvørjum glasi. Altso tveir fleiri, enn framleiðarin metti av fyrstan tíð.

3.000 fleiri prik

Higartil hevur hetta havt við sær, at sjúkrahúsverkið hevur fingið umleið 3.000 prik fleiri, enn um tað "bara" fingust seks skamtar úr hvørjum glasi.

Tað stendur í triðju støðulýsingini hjá koppsetingarbólkinum, sum er útgivin í dag.

Nú er áttanda hvørt fólk í Føroyum liðugt koppsett, og triðja hvørt fólk hevur fingið fyrra prikið, sigur sjúkrahúsverkið.