Biður um 169 mió. kr. til fámjinsbergholið

Jørgen Niclasen, landsstýrismaður, hevur biðið løgtingið um 169 milliónir krónur til at gera berghol millum Ørðavík og Fámjin.

Sambært uppskotinum, sum kom í tingið í gjár, verður bergholið 1,2 km. langt og 8,5 metrar breitt.

Harafturat skulu gerast vegir, ein kilometur í Ørðavík og 400 metrar í Fámjin. 

Jarðfrøðin á staðnum er soleiðis háttað, at bergholið skal tryggjast betur enn vanligt. Tað er við í kostnaðarmetingini.

Nýggj undangóðkenning

Bergholið skal vera liðugt í 2023 ella 2024. 

Landsverk hevur fyri aðru ferð biðið fyritøkur um at søkja um undangóðkenning til at sleppa at bjóða upp á bergholsarbeiðið.

Freistin er í hesum umfarinum 30.september kl.14.00.

Mett verður, at tað fer at kosta 1,6 mió. kr. um árið at reka bergholið.