ST-aðalskrivarin: Taliban heldur ikki givin lyfti

Taliban heldur ikki lyftini, sum teir hava givið afganskum kvinnum og gentum.

Tað sigur aðalskrivarin í ST, António Guterres.

Síðani Taliban tók valdið í Afganistan í august, hevur uppreistrarrørslan við fleiri høvi lovað borgarunum í landinum, at rættindi teirra vera vard, vísur Guterres á í fráboðan í gjár. 

- Tað týdningarmikla í hesum lyftum eru møguleikarnir hjá kvinnum at ferðast frítt, arbeiða og hava grundleggjandi rættindi, og hjá gentum at fáa atgongd til allar útbúgvingar á sama stigi sum dreingir, sigur ST-aðalskrivarin.

- Eg eri serliga stúrin um, at lyftini, sum Taliban hevur givið afganskum kvinnum og gentum, verða brotin, sigur Guterres. 

Hann heitir á Taliban um at halda síni lyfti og sínar skyldur í samsvari við mannarættindi og fólkarætt.