Klaksvíkar kommuna letur frítíðarskúlar aftur hesa vikuna

Klaksvíkar kommuna er eisini farin í hernað móti koronusmittustøðuni. Í gjárkvøldið avgjørdi kommunan, at frítíðarskúlarnir Snjallabjalla, Garðalisa og Skákið verða afturlatnir hesa vikuna.

Húsið verður eisini afturlatið nú í vikuni.

Húsið er karmur um frítiðarvirksemi hjá børnum úr triðja flokki til og við 18 ár.

Um dagstovnarnir og kommunalu dagrøktina sigur kommunan, at tey verða opin og veita tænastu í tann mun, tað letur seg gera.

Men spælistovan verður ikki opin hesa vikuna.

Tiltøkini hjá Klaksvíkar kommunu koma í kjalavørrinum frá, at landsstýrið í gjárkvøldið mælti til at royna at demma koronusmittuna inni lokalt í Norðoyggjum og Eysturoynni. 

Miðnám eisini afturlatið

Allir næmingar á Miðnámi á Kambsdali fáa fjarundirvísing hesa vikuna. Og tað sama gera flestu næmingarnir í skúlanum á Skúlatrøð í Klaksvík, har bara 1. til 3. flokkur skulu møta í morgun.

Boðini um at næmingarnir í hesum báðum skúlum skulu halda seg heima og í staðin fáa fjarundirvísing komu frá Løgmansskrivstovuni í gjárkvøldi.

Harafturat mælir Løgmansskrivstovan til, at frítíðarvirksemi hjá børnum og ungum verður avmarkað, har smittan ger mest um seg.

Mælt verður eisini til at útseta størri tiltøk, har børn og ung úr øllum landinum koma saman.

Løgmansskrivstovan upplýsir, at koronusmittan nørist serliga millum børn og ung, og serliga í Klaksvíkar kommunu, Eysturkommunu og Fuglafjarðar kommunu.

Hoyr samrøðuna, sum Jón Brian Hvidtfelt gjørdi við Bárð á Steig Nielsen, løgmann, í gjárkvøldið: