Lættari at fáa koyrikort til prutl

Nú skal gerast lættari at fáa stórt koyrikort til prutl.

Uppskot er gjørt um broyting í kunngerðini um koyrikort og koyrifrálæru.

Uppskotið er til hoyringar í løtuni.

Sum er kunnu 15 ára gomul taka koyrikort til lítið prutl, har hámarksferðin er 30 km/t.

Stórt prutl

Tá tey hava havt hetta koyrikortið í eitt ár, kunnu tey taka koyrikort til stórt prutl hjá einum koyrilærara. Har fáa tey seks tímar frálæru í ástøði og koyring.

Ætlaða broytingin er, at tey, sum hava havt lítið koyrikort í minsta lagi í eitt ár, kunnu fáa stóra koyrikortið uttan at skula til koyrilærara.

Ætlanin er eisini, at bera skal til at taka stort koyrikort í kvøldskúla, hóast fólk ikki hava lítið koyrikort.

Í broytingaruppskotinum eru eisini nýggjar ásetingar um talgilt koyrikort.