Tíðindafundur fyrrapartin um koronustøðuna

Tíðindafundur verður um koronustøðuna í dag kl. 11.

Tað boðar løgmansskrivstovan frá.

Tíðindafundurin verður sendur í sjónvarpinum og í útvarpinum.

Farsóttarnevndin var á fundi í gjár at viðgera koronustøðuna, og seint seinnapartin hevði Bárður á Steig Nielsen, løgmaður, kallað landsstýrið saman at viðgera støðuna og nýggjastu tilmælini frá farsóttarnevndini.

Í undantaksstøðu

Smittutilburðirnir hava gjørt eitt lop seinastu dagarnar, og í gjár var staðfest, at omikron-frábrigdið eisini var staðfest í Føroyum, millum smittaðu starvsfólkini á Landssjúkrahúsinum. 

Steinar Eirikstoft, forstjóri í sjúkrahúsverkinum, segði í gjár, at Landssjúkrahúsið er at kalla í undantaksstøðu, og sjúkrahúsið hevur sett fleiri umfatandi tiltøk í verk fyri at tálma smittuspjaðingini á Landssjúkrahúsinum.

2.538 kanningar vóru gjørdar týsdagin, og av teimum vóru 81 nýggir tilburðir vóru staðfestir.

Í løtuni eru 649 smittað í Føroyum, og 10 eru innløgd.