Mette Frederiksen til Grønlands at biðja um umbering

Danski forsætisráðharrin Mette Frederiksen fer á almenna vitjan í Grønlandi í døgunum frá 14. til 17. mars.

Tað boðaði forsætismálaráðið frá í gjár.

Fyrstu tveir dagarnar av vitjanini verður Mette Frederiksen í Nuuk, og seinnu tveir dagarnar verður hon í Ilulissat.

Á ferðini verður skipað fyri einum almennum tiltaki í sambandi við, at Danmark hevur givið eina almenna umbering fyri, at 22 grønlendsk børn í 1951 vórðu send til Danmarkar. Mette Frederiksen verður við til tiltakið, sum verður í Nuuk týsdagin 15. mars.

"Í 1952 vórðu 22 grønlendsk børn send til Danmarkar, og tað setti síni spor hjá teimum øllum. Tað hevur nógv at siga at geva eina almenna umbering vegna alt Danmark fyri hetta," sigur Mette Frederiksen í tíðindaskrivi.

Á ferðini skal danski forsætisráðharrin eisini umrøða veðurlagsbroytingar og trygd, nú kríggj herjar í Ukraina.

"Eg gleði meg nógv til at vitja Grønland. Núverandi støðan í Ukraina ávirkar allan ríkisfelagsskapin, og tað fari eg at tosa við landsstýrisformannin eins væl og alt landsstýrið um," sigur Mette Frederiksen í tíðindaskrivinum.

Hetta verður aðru ferð, at Mette Frederiksen vitjar Grønland sum forsætisráðharri.