Fleiri nýggir føroyameistarar í inniróðri

Stórur spenningur var í opna bólkinum hjá monnum, har Jógvan S. Højgaard í Klaksvíkar Róðrarfelag og Heri Klein Olsen úr Norðdepils-Hvannasunds Róðrarfelag kappaðust um FM

Símun Christian Olsen

14.03.2022 - 20:27

Nógvir nýggir føroyameistarar vórðu funnir, tá FM í inniróðri var í skúlanum við Streymin um vikuskiftið.

Stórur spenningur var í opna bólkinum hjá monnum, har Jógvan Steingrímur Højgaard úr Klaksvíkar Róðrarfelag vann í harðari kapping við Hera Klein Olsen úr Norðdepils-Hvannasunds róðrarfelag.

Róðurin var sera spennandi, og tá í avtornaði var bert eitt gott sekund á muni. Jógvan Steingrímur Højgaard róði teir 2000 metrarnar upp á 06.06.3, og Heri Klein Olsen kom á mál við tíðini 06.06.5.

Kristina Roest og Vár Guriardóttir Hansen sannførandi hjá kvinnum

Vár Guriardóttir Hansen úr Argja Róðrarfelag, sum er heimsmeistari á 500 metra teininum, hevði ongantíð vunnið FM-heitið á 2000 metrum undan kappingini um vikuskiftið, men tað broytti hon upp á leygardagin.

Hon vann sannførandi í U23-flokkinum, 23 sekund frammanfyri Sáru Dahl, sum fekk silvurið.

Í opna bólkinum við kvinnum vann Kristina Roest úr Frobiar Sóknar Róðrarfelag sítt fyrsta FM-heitið við tíðini 07.24.6.

Olgar Fuglø úr Norðdepils-Hvannasunds róðrarfelag vann FM í U23-flokkinum við tíðini 06.17.9 - ein sera góð tíð - frammanfyri Hákun Poulsen úr Havnar Róðrarfelag.