Christian er sinnaður at fara í landsstýrið

62 ára gamli advokaturin Christian F. Andreasen skal standa á odda fyri Fólkaflokkinum komandi tíðina. Hann er sjeyndi fólkafloksformaðurin í røðini.

Hann hevur higartil borið seg undan at fara í landsstýrið, tí tað hevði kravt, at hann hevði skuað sagt størv, nevndarsessir og aðrar álitissessir frá sær. Tann støðan er nú broytt.

- Sum formaður í Fólkaflokkinum eri eg klárur at fara í landsstýrið eftir komandi løgtingsval. Tað fer eisini við nógvari tíð og orku at vera formaður í Fólkaflokkinum, og eg fari komandi tíðina at taka støðu til, hvussu eg skal brúka mína tíð. Eg haldi tildømis ikki, at tað sømir seg, at formaðurin í Fólkaflokkinum er forseti í Fótbóltssambandinum, og tað fari eg at tosa við feløgini um í næstum, sigur hann.

Spenningar hava verið í Fólkaflokkinum seinastu mánaðirnar, og fremsta uppgávan hjá nýggja formanninum er at savna flokkin.

- Vit skulu eisini burtur frá prátinum um, at Fólkaflokkurin antin er ein útjaðaraflokkur ella ein miðstaðarflokkur. Fólkaflokkurin er ein landsflokkur, sigur hann.

Beinir biðin um at stilla upp

Beinir Johannesen var eisini í uppskoti at gerast formaður.

- Eg var biðin um at bjóða meg fram, og floksleiðslan hevur nú talað. Eg rokni við, at Christian Andreasen er eisini førur fyri at savna flokkin aftur, og hann fær mín fulla stuðul í tí arbeiðinum, sigur hann.

Christian F. Andreasen fekk 15 atkvøður, og Beinir Johannesen fekk 12.