Rækjutrolari farin at taka ímóti makreli

Rækjutrolarin Ólavur Nolsøe, sum varð keyptur til Fuglafjarðar fyrr í summar og kom undir føroyskt flagg 28.juni, fór sín fyrsta túr í gjárkvøldið.

Smápartafelagið JNO eigur trolaran, sum er keyptur úr Íslandi, har hann hevði navnið Rex. Hann er bygdur í Norra í 1986. Ólavur Nolsøe kann fiska rækjur í altjóða sjógvi og við Svalbard. Hann hevur fyribils rækjuloyvi, avmarkað til árið 2013. Men tað er tó ikki eftir rækjum, at hann fór út í gjárkvøldið.

Sambært Netavísin.fo er Ólavur Nolsøe farin at taka móti makreli í føroyskum sjógvi. Hann hevur fingið loyvi frá Fiskimálaráðnum at virka sum móttøkuskip.

Skipari er Jón Nolsøe Olsen, og við er 23 fólk, 22 menn og ein ung kvinna, skrivar Netavísin.fo.

Nú eru aftur seks rækjutrolarar í føroyska flotanum. Sermilik II hevur eisini avmarkað fiskiloyvi, sum er galdandi hetta árið. Hinir rækjutrolararnir eru Havborg, Arctic Viking, Varðborg og Akraberg.