Meinhard: avgerandi støður spilla spælið

Fjúrtan vitleysir minuttir í seinna hálvleiki vórðu dýrir fyri Føroyar ímóti Luksemburg á Tórsvølli týskvøldið.

Í 66. minutti feldi René Shaki Joensen ein leysan mótstøðumann og varð vístur av vølli. Síðan dømdi dómarin brotsspark ímóti Sølva Vatnhamar, og Gerson Rodrigues avgjørdi dystin úr ellivu metrum. Løtu seinni sendi Sølvi Vatnhamar albogan í bringuna á einum mótstøðuspælara, og so vórðu føroyingarnir bert níggju.

Føroyar megnaðu ikki av álvara at hótta Luksemburg eftir hetta, og máttu taka til takkar við ósigri, eftir at dysturin hevði verið nokkso javnur fyri steðgin.

Meinhard Egilsson Olsen, sum kanska var besti føroyski spælarin á Tórsvølli, helt, at avgerðirnar hesa løtuna høvdu kostað teimum dystin.

 - Eg føli, at tað eru nakrar ivasamar avgerðir, sum gera, at vit tapa dystin í dag, segði vongurin millum annað eftir dystin.