El-orka: Komandi útboð avgera kappingina

Tað sigur Johan Dahl, landsstýrismaður í vinnumálum, í svari til Janus Rein, løgtingsmann, sum spurdi um kappingina um vindorku og  elveiting. Spurt varð eisini um útboðið av vindmyllulundini í Húsahaga.

Landsstýrismaðurin vísir í svari sínum til avgerðina hjá Vinnukærunevndini um at staðfesta avgerðina hjá Jarðfeingi at geva SEV loyvið. 

Trupult at spáa um kapping
Tað er ilt at siga, hvussu verður við kapping á elorkuøkinum í framtíðini. Tað fara komandi útboð at vísa, sigur Johan Dahl.

Hann sigur, at landsstýrismaðurin kann við verandi elveitingarlóg bara tryggja sær, at aðrir framleiðarar hava ein veruligan møguleika at koma á elmarknaðin.

Johan Dahl endurgevur Vinnukærunevndina, sum sigur, at kapping er ikki eitt endamál í sær sjálvum, men eitt amboð at fáa lægri prísir og betri effektivitet sum frá líður.

Higartil hava tvey útboð verið um vindorku. Fyrra útboðið í 2010, tað var trý megawatt. Seinna útboðið var í fjør, tað var  11,7 megawatt.

Miðal streymframleiðslan um dagin er 40 megawatt og 20 megawatt um náttina.