![](https://kringvarp.fo/sites/default/files/styles/myndasavn-width/public/hitapottar_3.jpg?itok=mLkzw1XJ)
- Tíðindi, mentan og ítróttur
Fyrsti dagur á G!
![](https://kvf.fo/sites/default/files/styles/grein-ovasta-mynd/public/dsc06842.jpg?itok=15YoRT6-)
Ársins G!-festivalur fór av bakkastokki í gjár.
Hóast festivalurin ikki hevur verið seinastu tvey árini, so var tað ikki stúgvandi fult av fólki fyrsta dagin, sum tað onkuntíð hevur verið.
Men veðrið var gott og lagið tað sama.
Og longu áðrenn fyrsta navnið spældi, høvdu fólk sett seg í pottin.
Carlene Carter opnaði ballið
Fyrsta navnið á stóra pallinum í ár var countrysangarin, Carlene Carter.
Countryblóðið rennur í Carlene, sum er dóttir June Carter Cash, sum var gift við Johnny Cash.
Carlene treiv eisini í kenda sangin hjá stjúkpápanum, Ring of Fire.
Sandurin var ikki meira enn hálvfullur av fólki, tá Carlene spældi. Men tað tóktist ikki plága nakran.
Heiðurskonsert í Grundini
Sum nakað nýtt í ár, var hósdagurin á Grundini heilagur tungmálminum.
Og tíðliga á kvøldinum var ein heilt serlig konsert við SIC, sum upptraðkaðu fyri allar síðstu ferð.
Konsertin var ein kvøða til falna oddamannin í SIC, Mikkjal Gaard Hansen, ið tók seg av døgum í fjør.
Fleiri myndir frá teirri konsertini síggjast her.
Unga rappdrotningin setti eld á
Tað vóru kanska serliga tey ungu, sum funnu sær leiðina oman á sandin um midnáttarleitið, tá danska Tessa skuldi seta punktum við fyrsta dagin á stóra pallinum á ársins G!-festivali.
Hóast síni 24 ungu ár hevur danski rapparin, Tessa, av álvara gjørt um seg á danska tónleikapallinum. Tað eru ikki nógvir kvinnuligir rapparar í Danmark, men Tessa er ein av teimum.
Og tað gongur eisini væl hjá sokallaðu rapp-drotningini, sum spælir útseldar konsertir fyri og aðrar. Upprunaliga skuldi Tessa spæla á G! í 2020 og 2021, men festivalurin var av ongum orsakað av koronu.
Og meðan stóru tónleikaligu tiltøkini hava ligið í dvala orsakað av koronu, er Tessa flogin avstað við methøgari ferð.
Fyrsta staklagið hjá unga rapparanum var útgivið í 2019, og stutt eftir framførdi Tessa á Roskilde Festivalinum. Síðani eru stakløgini hjá Tessu seld í hópatali, og á Spotify eru sangirnir spældir yvir 50 milliónir ferðir.
Og eftir fjøldini á sandinum at døma, so hava føroyingar eisini lurtað nógv eftir rapparanum frá Hundige í Keypmannahavn.
Tessa var síðsta tónleikanavn at trína á stóra pallin á sandinum hóskvøldið. Eftir vanta tó fleiri nøvn at spæla á stóra pallinum sum eitt nú Daði Freyr (fríggjakvøld), José Gonzales (fríggjakvøld), Ásgeir (leygarkvøld), Teitur (leygarkvøld) og Eivør (leygarkvøld).
Sí fleiri myndir frá konsertini hjá Tessa og fyrsta dagi á G! á okkara instagram-vanga.