Roynir aftur at broyta stýrisskipanarlógina

Ætlanin er m.a. at broyta orðingina soleiðis, at kvinnur í løgtinginum ella landsstýrinum kunnu vera kvinnur og ikki menn

Bárður á Steig Nielsen, løgmaður, ætlaði at broyta stýrisskipanarlógina í seinastu tingsetu, men tað var av ongum. Broytingar í stýrisskipanini eru aftur í løglistanum, sum verður lagdur fram ólavsøkudag.

Høgni Djurhuus

27.07.2022 - 08:38

Stýriskipanarlógin skal endurskoðast og broytast stendur í løglistanum, sum løgtingið fekk frá landsstýrinum á ólavsøku í fjør.

Og broytingaruppskotið kemur í hesari tingsetuni, segði løgmaður tá, fyri einum ári síðani.

Men tað kom ikki.

Stýriskipanin verður tó aftur í løglistanum, sum løgtingið fær fríggjadagin, ólavsøkudag.

Løgtingskvinnur og landsstýriskvinnur

Orðini løgtingsmaður og landsstýrismaður skulu broytast, so kvinnur í løgtinginum ella landsstýrinum kunnu vera kvinnur og ikki menn.

Eisini verður hugsað um fíggjarmálsviðurskifti, millumtjóðaviðurskifti, uppgávubýtið millum løgtingsins umboðsmann og Landsstýrismálanevndina hjá tinginum, valrætt til ómynduggjørd, kommunuviðurskifti og um rættarliga og politiska ábyrgd av teimum málum, sum løgd eru til sjálvstøðugar nevndir, sum taka endaligar avgerðir.

Fundir hava verið um stýrisskipanina, bæði í landsstýrinum og við floksformenninar í løgtinginum.