Pengar mugu eisini fylgja við

- Fólkaskúlalógin skal dagførast hetta næsta árið, og tíma- og lærugreinabýtið skal endurskoðast, eins og lutfallið millum tær ymsu lærugreinarnar.

Tað segði Bárður á Steig Nielsen, í ólavsøkurøðu síni, tá ið hann umrøddi fólkaskúlan.

Eisini mælti hann til at hyggja at, hvussu stórir skúlaflokkarnir skulu vera, hvussu skúladagurin kann styttast, og hvussu føroyskt sum annaðmál betur kann skipast.

Formaðurin í Lærarafelagnum, Jákup Eli Olsen, hevur eitt sindur ilt við at skilja, hvat meiningin er við hesum ætlanunum, løgmaður legði fram á ólavsøku, um tær ikki byggja á tillagingar av læraraútbúgvingini.

– Skal tað gerast, mugu pengar eisini fylgja við, tí annars verður tað bara eitt eiti, sigur Jákup Eli Olsen.