83 dagar á opnum havi

28. mai settust tríggir menn við árarnar á havgangandi róðrarbátinum, Guðrun. Teir løgdu frá landi nakað sunnanfyri Miami í Florida í USA.

Kósin var sett móti Føroyum. Teir væntaðu, at ferðin fór at taka tveir til tríggjar mánaðir.

Umborð vóru føroyingarnir, Edmund Berg og Jákup Jacobsen, og bretin, Neil Blackeby.

Guðrun kom kortini ongantíð til Føroya. Eftir 83 dagar á opnum havi endaði ferðin nakað vestanfyri Írland.

Tríggir fjórðingar av teininum vórðu lagdir afturum, tá ið ein sjógvur gjørdi, at báturin fór at leka.

Støðan var so mikið hættislig, at føroyingarnir fóru í gummibátin.

Eftir fimm tímar kom stóra farmaskipið, Nordic Qinngua, til bjargingarbátin.

Men tá var ikki sloppið. Níggju metrar vóru upp á dekkið, og aldan var seks metrar høg.

Tað eydnaðist Jákupi at fáa fatur í reipstiganum og koma sær í bátin.

Tá var Edmund einsamallur eftir í bjargingarbátinum.

- Í veruleikanum var hetta vandamiklasti partur av ferðini, ásannar Edmund Berg. 

Fleiri royndir vórðu gjørdar, men tað eydnaðist honum ikki at koma upp.

Eftir hvørja miseydnaða roynd mátti farmaskipið brúka ein góðan tíma at venda.

Fimtu ferð riggaði tað.

Edmund fekk tikið í stigan. So var bara at halda fast, tí hann fór undir, tá aldurnar skolaðu.

Kenslan at koma upp á dekkið er ring at lýsa.

Føroyingarnir eru takksamir fyri góðu viðferðina, teir fingu frá manningini á farmaskipinum. - Vit vóru bornir á lógvum.

- Tað verður eingin havrógving aftur fyri mítt viðkomandi, Tað hevði eg sett mær fyri, áðrenn vit fóru avstað.

Tú hugsar øðrvísi um tilveruna eftir eina slíka uppliving.

Vit hava tað so gott í Føroyum, og vit knarra um einki, sigur Edmund Berg, avgjørdur.