Ísland stuðlar Føroyum

Landsstýrið fær fullan stuðul frá íslendsku stjórnin, nú landsstýrið dregur ES fyri altjóða gerðarrætt í sambandi við makrel- og sildastríðið við ES

Íslendska stjórnin stuðular landsstýrinum í stríðnum við ES

Uni L. Hansen

Finnur Koba

16.08.2013 - 17:01

Samstundis sum landsstýrið seinnapartin boðaði frá, at tað dregur ES inn fyri altjóða gerðarrætt í sambandi við makrel- og sildastríðið við ES, heitir íslendska stjórnin á ES um at taka aftur hóttanirnar um handilstiltøk mótvegis Føroyum og Íslandi.

Tað stendur í eini fráboðan, sum íslendsku stjórnin fyri løtu síðan hevur sent út.

Harvið stuðlar íslendska stjórnin føroyska landsstýrinum í stríðnum móti ES.

Í hvassorðaðu fráboðanini mótmælir íslendska stjórnin harðliga framferðarháttinum hjá ES, sum hóttir Føroyar og Ísland við handilstiltøkum í royndunum at finna semju um býtið av ferðandi fiskastovnunum í Norðuratlantshavi.

Íslendska stjórnin vísir - eins og landsstýrið - á, at sambært altjóða lóg skulu lond leggja seg eftir at loysa trætur sínámillum við friðarligum hættum.

Íslendska stjórnin heitir staðiliga á ES at taka hesar hóttanir aftur og fylgja teimum skyldum, ES hevur bundið seg til sambært altjóða rætti.

Les fráboðanina frá íslendsku stjórnini her: http://www.mfa.is/news-and-publications/nr/7741