50 metrar av gassleiðingini eru burtur

Fríggjadagin steðgaði lekin á gassleiðingunum Nord Stream í Eystrasalti, og síðani var farið at kanna skaðan nærri.

Svenska blaðið Expressen gjørdi avtalu við norska felagið Blueye Robotics, sum sendi eina undirsjóvardronu at kanna skaðan.

Ein av myndunum vísir leivdir av Nord Stream 1-gassleiðingini, sum sløðast eftir botninum á 80 metra dýpi. Myndin vísir eisini, at 50 metrar av leiðingini eru burtur.

Yvirgangur

Nord Stream 1 og 2-gassleiðingarnar ganga úr Russlandi til Týsklands og fara gjøgnum bæði danskan og svenskan sjógv. 

28. september var staðfest, at báðar gassleiðingarnar vóru farnar at leka, og skjótt var eisini staðfest, at talan ikki var um vanligan leka, men yvirgang.

Enn er ikki greitt, hvør hevur ábyrgdina av spreingingunum, men málið verður nú kannað bæði í Svøríki, Danmark og Týsklandi.

Gass stóð í rørunum, tá ið yvirgangurin varð framdur, men báðar leiðingarnar vóru stongdar.