Sparikassin skal gera tillagingar í sambandi við hvítvask

Danska fíggjareftirlitið vil hava Norðoya sparikassa at endurskoða váðameting og bøta um mannagongdina í sambandi við hvítvask.

Tað sigur Norðoya sparikassi í dag.

Fíggjareftirlitið var á eftirlitsvitjan í mai í sambandi við mannagongdirnar hjá peningastovninum at byrgja fyri hvítvaski og at fíggja yvirgang.

Fíggjareftirlitið sigur í frágreiðingini, at vandin fyri, at sparikassin verður misnýttur til hvítvask og at fíggja yvirgang, er á sama stigi sum hjá øðrum peningastovnum, ið sparikassin kann sammetast við.

Fíggjareftirlitið staðfestir, at Norðoya sparikassi skal endurskoða váðameting og bøta um mannagongdirnar, tá ið ræður um hvítvask.

Sparikassin sigur í tíðindaskrivinum, at hann tekur frágreiðingina til eftirtektar, og fer at gera neyðugar tillagingar.

Frágreiðingin frá Fíggjareftirlitinum kann lesast her.

Meiri verður at frætta í útvarpstíðindunum klokkan 18, tá samrøða verður Marner Mortensen, stjóra í Norðoya sparikassa.