Eftir 1-1 ímóti Kosovo: Patrik váttar skiftið til Breiðablik

Bert læknakanning og undirskrift manglar, áðrenn Patrik Johannesen kann kalla seg Breiðablik-spælara.

Fyrr í dag skrivaðu íslendskir miðlar, at føroyski framherjin, sum hevur staðið seg væl í ár í felagi sínum, Keflavík, er á veg til íslendska meistaraliðið, og eftir 1-1 javnleikin í venjingardystinum ímóti Kosovo váttaði Patrik Johannesen skiftið.

 - Teir hava lagt fleiri boð inn í hálvanannan mánaða nú, og nú eru feløgini so blivin samd. Vit eru samd um tað persónliga, so nú er tað bara læknakanningin og undirskrift sum mangla, segði Patrik Johannesen, sum byrjaði inni í dag.

Breiðablik skal sambært íslendskum miðlum gjalda eina góða hálva millión fyri føroyska landsliðsspælaran, sum eisini ætlar sær eitt gott landsliðsár í 2023.

 - Eg havi sjálvandi ambitiónir um at verða verandi á liðnum. Eg havi verið eitt sindur út og inn, men vónandi fer skiftið at hjálpa mær at koma longur inn á landsliðið, segði Patrik Johannesen.