Vænta ikki nógvan útróður hesa vikuna

Streymurin verður góður næstu dagarnar, men harðnar, sum vikan gongur, og av tí at veðrið ikki verður so gott, roknar Fiskamarknaður Føroya ikki við nógvum útróðri, nú jólini stunda til.

Tvey av smærru ísfiskalínuskip eru til fiskarí og landa bæði í dag.

Øll frystilínuskipini - uttan tvey - eru til fiskarí, og væntandi landa tey í vikuni.

Ein djúpvatnstrolari, sum er á svartkalvaveiðu, og kemur inn fyrst í vikuni, og ein liggur við bryggju.

Trolarar smáligt fiskarí

Fimm trolarapør eru til fiskarí, men hava smáligt fiskarí. Tey koma øll at landa í vikuni.

Tað er mest upsi, tey fáa, men eisini nakað av hvítum fiski, serliga longu og hýsu.

Fýra trolbátar eru á Skeivabanka og fiska mest av havtasku, men teir hava smáligt fiskarí. Allir landa í dag.

Fýra garnaskip eru úti. Tvey, sum fiska svartkalva, hava brúkiligt fiskarí, men hjá tveimum, sum fiska havtasku, er fiskaríið misjavnt. Øll garnaskipini landa í hesari vikuni.