Nú ber til at skriva seg upp til leigubústað

Mánadagin 2. september ber til at skriva seg á bíðilista til ein leigubústað. Við uppskrivingini verður tú  samstundis limur í Bústøðum, Føroya bústaðafelagi.

Næstu fýra til sjey árini fara Bústaðir at byggja 100 leigubústaðir um árið. Bíðilistin er eitt týðandi amboð, sum bæði gevur borgarunum atgongd til at fáa ein leigubústað og samstundis gevur Bústøðum vitan um, hvussu nógvum bústøðum tørvur er á, hvar í landinum tørvurin er og hvørja stødd á bústaði, fólk ynskja, siga Bústaðir í tíðindaskrivi.

Kostnaðurin fyri at koma á bíðilistan er 200 kr. 

Lutakast um umsóknirnar

Allar umsóknir, ið koma inn í tíðarskeiðnum frá 2. til 30. september, verða skipaðar tilvildarliga við lutakasti á ein bíðilista, so tað verða ikki starvsfólkini á Bústøðum, ið avgera, hvat nummar umsøkjararnir hava á bíðilistanum.

Tað ræður tí ikki um at verða fyrstur at lata umsóknina inn, men heldur verða umsóknirnar javnsettar fyrstu tíðina við lutakastinum. Men umsóknir, ið koma inn eftir 30. september 2013, fara aftast á bíðilistan, siga Bústaðir í tíðindaskrivinum.