Pápin var gittarúrmælingur, men mamman sang fyri teimum, tá tey vóru børn

Guðrið Hansdóttir, Fróði Hansen og Bjarki Hansen eru væl kendir sangarar og sangskrivarar í Føroyum. Umframt tónleikin hava tey tað til felags, at tey eru systkin. Pápi teirra var hin væl kendi gittarúrmælingurin Hans Carl Hansen, sáli, sum spældi við "Veðraplátuni" hjá klaksvíksbólkinum Straight Ahead. Gjøgnum hann hava tey fingið musikalskan førning. Men systkini eru ikki gittaristar burturav - gittarin verður heldur brúktur sum fylgispæl til sangirnar, tey syngja. Sangin hava tey hinvegin fingið frá mammuni, sum sang nógv fyri teimum, tá tey vóru børn. Í næstu viku verða systkini at hoyra á palli í Reinsaríinum í Havn. Konsertin hóskvøldið 29. des kl. 20 er longu útseld, men eykakonsert verður fríggjakvøldið eftir, somuleiðis kl. 20. Hoyr systkini Hansen og Hansdóttir hugleiða um tónleik og tað at vaksa upp saman. Hetta innslagið varð sent í sendingini Vikuskiftið 23. des 2022.