Farmaflogfarið er seinkað

Farmaflogfarið hjá FarCargo er seinkað, men kemur væntandi í fyrsta ársfjórðingi í ár.

Tað boðar Birgir Nielsen, stjóri í FarCargo, frá.

Ætlanin hjá FarCargo var at fáa sítt Boeing 757 farmaflogfar í desember í fjør.

Ætlanin er, at farmaflogfarið skal flyta feskan laks hjá Bakkafrosti úr Føroyum til New York og møguliga aðrastaðni eisini.

Hava sett part av manningini
Fyrireikingarnar til farmaflogverkætlanina hjá FarCargo hava annars gingið sum ætlað, sigur felagið.

Felagið hevur sett part av flogmanningini, sum síðstu mánaðirnar hava verið til kravda simulatorútbúgving í Frankaríki fyri at lúka krøvini at flúgva Boeing 757 flogfør.

Ætlanin at byrja farmaflúgving millum Føroyar og USA við laksi og at bjóða flogfarmatænastur á heimferðini til Føroyar um Danmark eru óbroyttar, sigur felagið.