Flogbóltsfinalistarnir funnir

Nú er greitt, hvørji lið møtast í steypafinalunum í flogbólti hjá bæði kvinnum og monnum.

Allar fýra hálvfinalurnar vóru í Badmintonhøllini í Klaksvík í gjár.

Hjá kvinnunum verða tað Fleyr og SÍ, sum spæla steypafinalu, eftir at tey í hálvfinalunum vunnu á ávikavist Ternuni og TB.

Serliga spennandi var dysturin millum SÍ og TB, tí har máttu fimm sett til, áðrenn SÍ hevði vunnið, men í hinum dystinum vann Fleyr trygt 3-0 á Ternuni.

Hjá monnunum vóru báðar hálvfinalurnar spennandi, tí í báðum dystunum skuldu fimm sett til, áðrenn steypafinalistarnir vóru funnir.

Har verður finalan millum SÍ og Mjølnir, sum vunnu 3-2 á ávikavist Fleyr og ÍF.

Steypafinalurnar verða í høllini á Hálsi í Havn leygardagin 4. mars.