Herbergini vóru fullsett allar mánaðirnar í fjør

Herbergið í Havn og Gloria í Klaksvík vóru fullsett allar mánaðirnar í fjør.

Tøl frá Hagstovuni vísa, at í fjør búðu 26 fólk nærum allar mánaðirnar á herbergunum í Havn og í Klaksvík, og í januar í ár vóru tey 27 tí tali.

Í fjør vóru tilsamans 26 kømur, og í januar ár er eitt kamar komið aftrat.

Hagtølini vísa eisini, at seinasta árið hava nærum øll tey somu fólkini búð á  herbergunum í Havn og í Klaksvík.

Nýtslustigið meira enn 100 prosent

Herbergið í Havn er bæði náttarherbergi og vanligt herbergi. Tvey kømur eru til náttarherbergi. 

Uppgerðin vísir, at kømrini vóru upptikin mest sum allar dagar í fjør, og nýtslustigið er sostatt 100 prosent. 

Ávísar mánaðir í fjør var nýtslustigið á náttarherberginum meira enn 100 prosent, og tá var neyðugt at brúka eyka seingjarmadrassur at hýsa fólki.