Koyra ov nógvan mat burtur

Í greiningini, sum SMJ gjørdi fyri Tórshavnar kommunu, sæst, at matleivdir vanliga liggja millum 40 og 50 prosent í Danmark og Tromsø í Norra, so nøgdirnar í Føroyum liggja nakað oman fyri hesi bæði støð. 

Kanningin varð gjørd í november 2022, har fimm prosent av vikuliga húsarhaldsburturkastinum bleiv greinað og býtt í átta ymsar bólkar. 

Bjørg Dam, forkvinna í náttúru- og umhvørvisnevndini í Tórshavnar býráð, sigur tað vera serliga áhugavert, at úrslitini frá skiljingini vísa, at býtið millum bólkarnir er nakað øðvísi enn tað, ið væntað varð at síggja, um samanborið verður við dátur úr øðrum londum. 

Samanborið við Danmark og Tromsø, er minni glas og metall í burturkastinum í Havn, samstundis sum nøgdin av papp og pappír eisini er nakað lægri enn í Tromsø.

– 28 kilo av pappi og pappíri er tó í meira lagi, tá ið hugsað verður um, at hetta hevur verið skilt frá vanliga húsarhaldsruskinum í skjótt 20 ár, sigur Bjørg Dam.