Formaðurin í Nýggju Borgarligu koyrdur frá

Lars Boje Mathiesen er koyrdur úr fólkatingsbólkinum og úr flokkinum hjá Nýggju Borgarligu í Danmark, skrivar danska TV 2.

Hann fer frá sum formaður í Nýggju Borgarligu, og fer eisini úr flokkinum.

Tað váttar Jesper Hammer, sum er næstformaður í høvuðsstýrinum hjá flokkinum, fyri TV2.

- Eg kann vátta, at Lars Boje Mathiesen verður koyrdur úr flokkinum. Tað var høvuðsstýrið samt um í gjárkvøldið, sigur Jesper Hammer.

Hann skrivar í einum telduposti, at Lars Boje Mathiesen hevur kravt at fáa umleið 350.000 kr. fluttar á privata kontu til persónlig politiskt átøk.

Lars Boje Mathiesen var valdur til formann í flokkinum 7. februar í ár, og hevur tí bara sitið ein mánað í sessinum. Hann tók við eftir Pernille Vermund, sum stovnaði flokkin.

Nú hevur flokkurin bara tríggjar fólkatingslimir eftir. Við valið í november fingu Nýggju Borgarligu seks tinglimir.