Kend andlit í danskari undirhaldssending

12-04-2023

Jens Marni Hansen og Søren H. Pedersen eru við í stórari, nýggjari undirhaldssending, sum byrjar fríggjakvøldið á DR1.

- Her í Føroyum ger mann ofta tað sama, so hví ikki royna nakað øðrvísi og stuttligt.

Soleiðis sigur Jens Marni Hansen, sum saman við Søren Haugaard Pedersen verður at síggja í nýggju stóru undirhaldssendingini, Stjerneklar, sum fyrstu ferð verður at síggja fríggjakvøldið.

Longu í septembur í fjør fingu teir báðir fyrispurning frá Danmarks Radio um at vera við í nýggju undirhaldssendingini.

- Eg gjørdi teimum greitt beinanvegin, at skuldu onkrir dómarar sita har og avgera, um eg syngi væl ella ikki, so tímdi eg ikki at vera við. Men tað fekk eg lovað, at soleiðis var ikki, og tí tími eg at taka lut í sendingini, sigur Søren Haugaard Pedersen, ið dagliga arbeiðir sum lærari.

Stjerneklar eitur nýggja undirhaldssendingin hjá DR, sum fyrstu ferð verður at síggja nú fríggjakvøldið. Jens Marni Hansen fer á pallin 21. apríl, meðan Søren Haugaard Pedersen skal upptraðka fríggjakvøldið 12. mai.

Talan er um eina beinleiðis sending, sum verður at síggja næstu átta fríggjakvøldini, har luttakararnir skulu syngja og upptraðka sum teirra fyrimynd.

Í morgunsendingini greiða Jens Marni Hansen og Søren Haugaard Pedersen frá sendingini.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri.

Samband: gmf@kvf.fo, telefonnummar +298 347500