Ungir kollfirðingar flyta av bygdini

Av tí at eingi grundstykki eru at fáa, noyðast ungir kollfirðingar at flyta av bygdini, og tað gongur út yvir barnatalið, sum er søguliga lágt í Kollafirði.

Stóri trupulleikin er, at hóast fólkatalið er vaksið tað sama sum aðrastaðni, er talið á børnum fallið so nógv, at tað veruliga merkist í bæði skúla, ítrótti og øðrum.

Orsøkin er heilt einfalt, at ongar barnafamiljur flyta til, samstundis sum tey ungu mugu flyta av bygdini, um tey vilja seta búgv, tí eingi grundstykki eru at fáa.

Bara ein útstykking er gjørd í Kollafirði í hesi øldini, og skal skeiva demografiska gongdin vendast, er neyðugt at hugsa stórt og gera nakað munagott sum skjótast.

Tað heldur Anja Weyhe, forkvinna í KÍF.

Týskvøldið klokkan sjey verður borgarafundur í Kollafirði, har høvuðsevnið er gongdin í fólkatalinum og samansetingin av fólki í bygdini.

Millum annað verður ein framløga, ið vísir demografisku gongdina í Kollafirði, samanborið við restina av landinum, og spurt verður, hvat gongdin merkir fyri eina bygd sum Kollafjørð, og hvørji framtíðarútlitini eru.