- Eg gav soninum sangin og segði, at hann kundi gera júst tað, hann hevði hug til við sangin. Julian fekk púra fríar teymar. Og eg haldi, at úrslitið bleiv bara heilt gott.

Soleiðis sigur Árni Andreasen, sum júst nú er nógv at hoyra við sanginum "Tá eg sá teg". Ein sangur, sum ljóðar munandi øðrvísi enn tað, vit vanliga seta í samband við Árna Andreasen.

- Í roynd og veru gjørdi eg sangin í protest móti øllum tí dapra og tunga, sum er rættiliga nógv at hoyra í føroyskum tónleiki fyri tíðina. Hesin sangurin er lættur, banalur og einfaldur, sigur Árni Andreasen.

Og júst tað meira modernaða ljóðið hevur sonurin, Julian, syrgt fyri.

- Fyrstu ferð eg hoyrdi sangin, dámdi mær hann væl, men ofta er babba eitt sindur old school, so eg havi roynt at fingið eitt meira modernað ljóð, sigur Julian Andreasen.

Í morgunsendingini greiða feðgarnir báðir frá samstarvinum og siga søguna um sangin "Tá eg sá teg".