Í annaðkvøld, leygarkvøldið klokkan 20, verður finalan í tónleikakappingini Sement. Tað hava verið trý innleiðandi umfør, og 17 bólkar hava framført.

Seks bólkar eru komnir víðari í finaluna, og teir skulu allir á pallin aftur í annaðkvøld. Æðrasoppar, Tórmóður, Eimyrja, Nimbus Tópus, Dóttir og Benjamin Rajani eru í finaluni.

Brøðurnir Heri Wang Danielsen og Svend Danielsen hava sent beinleiðis í sjónvarpinum frá Sement seinastu trý leygarkvøldini og vera aftur at síggja á skíggjanum í annaðkvøld.

Teir eru partur av ungdómstoyminum hjá Kringvarpi Føroya, Biit, sum stendur fyri sjónvarpsframleiðsluni.

- Tað hevur verið sera stuttligt, og eg haldi, at øll innleiðandi umførini hava riggað sera væl. Bæði hjá okkum, og hjá øllum tónleikarunum, siga teir báðir.

Teir vænta eina spennandi finalu í annaðkvøld, tí allir bólkarnir eru sera góðir.

- Tað hevur verið góður hýrur í Reinsarínum, bæði tónleikarar og áskoðarar hava hugnað sær sera nógv, og í annaðkvøld verður tað óivað gott og stuttligt, tí har er útselt, sigur Svend Danielsen.