Kvinnur og menn eru á flestum økjum ósamd um spurningar viðvíðkjandi javnstøðu. Tað finst við øðrum orðum ein gjógv millum kynini viðvíkjandi fatanum, upplivingum og sjónarmiðum um javnstøðu.

Soleiðis ljóðar ein av høvuðsniðurstøðunum í kanningini um javnstøðu í Føroyum, sum Fróðskaparsetur Føroya, Javnstøðunevndin, Demokratia og Almanna- og mentamálaráðið hava samstarvað um.

Lóðir hevur staðið fyri innsavningini av data, og tað eru Erika Hayfield, Herit Albinus og Heini í Skorini á Søgu- og samfelagsdeildini, ið hava greinað úrslitini og skrivað eina frágreiðing.

Umráðandi at fáa vitan um javnstøðu í Føroyum

Brandur Mortensen Nolsøe og Bjørk Maria Kunoy fegnast um føroyska tilfarið, tí tað fer at gera javnstøðuarbeiðið í Føroyum lættari.

- Tá mann hevur okkurt at arbeiða út frá og vísa á, so ber meira til, siga tey.

Áðrenn hava vit brúkt norðurlendskt tilfar og gitt okkum fram til, um tað sama man vera galdandi í Føroyum.

- Nú kunnu vit samanbera okkum við Norðurlond og síggja, hvar tær størstu avbjóðingarnir eru á javnstøðuøkinum, siga tey bæði.

Nakrar høvuðsniðurstøður úr kanningini eru, at javnstøða hevur størri persónligan týdning fyri kvinnur enn fyri menn, og at menn arbeiða meira eftir, at teir hava fingið børn, meðan kvinnur arbeiða minni, eftir at tær hava fingið børn.

Kanningin verður løgd fram í Kongshøll í dag kl. 14.00.