- Í Danmark hava vit upp móti 200.000 børn og ung, sum viga ov nógv. Av teimum hevur helvtin ov høgt blóðtrýst, 31 prosent hava feittlivur, 45 prosent hava svøvnapnø, 28 prosent hava ov høgt kolesterol, 14 prosent hava prediabetes umframt ringa samvitsku, D-vitamintrot og alt møguligt annað, uttan at tey fáa ta umsorgan og hjálp teimum tørvar, tí Danmark enn ikki hevur viðurkent ovurvekt sum eina sjúku, sum tey hava gjørt aðrastaðni í heiminum.

Heilsufrøðingar, dietistar og onnur, sum arbeiða við børnum í Føroyum, eru í hesum døgum á skeiði, har tey læra um Holbæk arbeiðsháttin, sum Jens Christian Holm brúkar í sínum dagliga arbeiði. Í hesum arbeiðshátti verður yvirvekt sæð sum ein hvør onnur sjúka.

- Um vit ímynda okkum at onkur fær krabbamein, so tosa vit ongantíð um motivatión sum ein máta at gerast frískur uppá. Tað høvdu vit ongantíð gjørt, tí tú hevur brúk fyri umsorgan og góðari tænastu frá sjúkrahúsverkinum tá. Soleiðis arbeiða vit eisini, og siga fólkum bæði beinleiðis og óbeinleiðis at tey hava ein trupulleika, og sum oftast vita tey tað jú sjálvi.

Víðari greiðir hann frá, at ílegur okkara spæla ein stóran leiklut, tá tað snýr seg um møguleikan fyri at koma til at viga ov nógv, tí 55 til 70 prosent av teimum av teimum, ið viga ov nógv, gera tað orsakað av ílegum.

- Tað er sum við eygnaliti. Tú kanst gera líka lítið við at tú hevur grøn, brún ella blá eygu, sum tú kanst gera við, at tú hevur lyndi til at viga ov nógv, tá tað eru í legurnar, ið stýra.
Ein av teimum, sum heldur seg fáa nógv burturúr hesar dagarnar, er Sólrun Foldbo, leiðari í Gigni.

- Tað er so týdningarmikið at vit í okkara arbeiði, út frá hesum arbeiðsháttinum, kunnu frátaka børnum og ungum skommina og skuldina, sum tey ofta ganga við, tá tey viga ov nógv. Tí hesum sleppa tey undan, tá tey fáa at vita, at tað er meira komplekst enn so.