Bólkurin Aggrasoppar, er ein av teimum bólkunum í Føroyum, sum av álvara hevur fingið luft undir veingirnar.

Tey hava júst spælt á Spot festivalinum í Aarhus. 

- Tað var stuttligt at spæla har og at vinna Sement. Ein av orsøkunum til, at vit meldaðu okkum til Sement, var vónin um, at sleppa á festivalin, siga tey.

Eisini vísa tey á, at festivalurin er eitt slag av einum vinnufestivali, tí har eru mong, ið bert eru komin fyri at deila vitjanarkort út.

- Summi lurta bert eina lítla løtu, kanska fimm sekund, so um bólkurin ikki fangar teirra áhuga, so eru tey skjót avstað aftur. Hetta er tað kensluleysa við tónleikavinnuni, siga tey.

Nógvir bóltar í luftini

Men sjálvt um tey júst eru lend, so eru tey á veg avstað aftur. 

Í vikuni spæla tey í Brighton á The Great Escape festivalinum, har eisini aðrir føroyingar vera við, sum Jazzygold, Marianna Winter og FRUM.

Nógvir bóltar eru í luftini, og har er nógv at halda skil á, tí meðan tey eru burturstødd verður eitt nýtt lag útgivið, sum er ein partur av einari fløgu, ið kemur seinni.

Lagið eitur Búff & Buffét og kemur út 12. mai. 

- Tað er stuttligt, at hetta byrjaði sum ein koronaverkætlan, og nú eru vit komin her til, siga tey.