Loysn í eygsjón í málinum um børn við Downs Syndromi

Ein loysn á trupulleikunum á Sernámi í sambandi við børn við Down Syndromi, er nú í eysgjón.

Landsstýrismaðurin í barna- og útbúgvingarmálum, Djóni Nolsøe Joensen, sigur, at hann hevur skundað undir arbeiðið, og roknar við, at ein loysn er funnin hesa vikuna. 

Fleiri foreldur hava í longri tíð lagt Sernám undir at gera mun á børnum við Down Syndromi.

Summi børn hava, sambært foreldrunum, fingið játtan til ávísan stuðul, samstundis sum foreldur teirra hava fingið boð um ikki at tosa við onnur foreldur um hetta.

Stjórin á Sernámi, Margreth Olsen, hevur víst øllum ákærum aftur, og hevur tvíhildið um, at Sernám ger ikki mun á børnum.

Fundur við áhugafeløg

Fríggjadagin fyri góðum tveimum vikum síðani boðsendi landsstýrismaðurin so umboðum fyri Javna, Megd, foreldur og Sernám á fund.

Eftir tann fundin lovaði landsstýrismaðurin, at ein loysn skuldi finnast skjótt.

Tá ásannaði landsstýrismaðurin eisini, at í løtuni fáa ikki øll børn við Down Syndromi tað máltilboðið, sum øll vilja hava.

- Sjálvandi skulu tey hava tað, segði hann, og segði seg tí ætla at finna eina loysn, so neyðuga hjálpin kann verða veitt øllum børnum, sum hava Downs Syndrom.

Fólk í Barna- og Útbúgvingarmálum hava - saman við fólki á Sernámi - arbeitt við at finna eina loysn á málinum, sum nú, sambært landsstýrismanninum, er í eygsjón.